Banci (ban-chi)

Sya si Banci. Ang aming collective aso.

Ilang buwan pa lang sya nang ibigay sa amin ng isang Intsik na may mareklamong kapitbahay. Hindi ko alam ang breed nya pero who cares. Obviously she doesn’t.

Malambing sya. Nang minsang mawala kami ng lampas isang linggo sa bahay at naiwan sya sa ibang kamay, sumabog ihi nya pagkakita nya sa amin.

Hindi sya mahilig sa kanin. Yan ang kaibahan ko sa kanya. Matakaw sya sa dog food. Yan ang kaibahan nya sa akin.

Nang ibinigay sya sa amin, maraming habilin ang huling may-ari sa kanya:

1. Huwag pakainin ng buto ng manok. Busugin sa gulay at prutas.
2. Paliguan minsan isang linggo at putulan ng kuko minsan isang buwan.
3. Bigyan ng gamot para sa puso at para sa tapeworm. Wag kalimutang dalhin sa beterinaryo.
4. Gamitan ng dog shampoo at dog powder.
5. Gupitan ng buhok laluna kapag summer.
6. May kasama syang kulungan pero wag nyo syang ikukulong.

Parang last will and testament.

Ibinigay din nya sa amin ang bag na ito:

Ito ang gamit namin para maisakay sya sa bus, MTR at taxi. Dinadala namin sya sa beach, sa office at sa rally. Ang bakla-bakla ko pag bitbit ko sya dito.

Maraming batas dito patungkol sa mga alaga. Kailangan mo pa ngang palagyan ng chip na nakalagay ang detalye nya at kung sino ang may-ari. Andami ding mga grupo ng lokal na pangunahin eh animal welfare ang programa.

Pansin ng isa kong kaibigan na ex-Hong Kong, mas pinahahalagahan daw ang aso dito kesa sa tao. Naalala ko tuloy yung isang kliyente na syang unang nagpaiyak sa akin. Yung kumakain kasama ng aso. Pag tumae ang aso, kailangan nya munang linisin bago sya bumalik sa pagkain.

Meron din akong nakitang aso na nakasuot ng winter clothes na galing Burberry at worth HK$2,000 daw ang isa.

May punto nga siguro ang kaibigan ko.

*****

Kanina eh sumama ako sa rally dahil pagbobotohan sa Legislative Council ang proposed Race Discrimination Bill. Sobrang walang-kwenta ang proposal na kahit sa papel pa lang eh wala ka ng makikitang tunay na proteksyon laluna sa mga DH na syang pinakarami kung usapin ng ibang lahi sa HK.

May punto nga siguro ang kaibigan ko.